TUAM TSWJ TSAB PEB CAUG LU LUG
Hawm txug tsoom Puj Yawm, Nam Txiv, Kwv Tij, Nkauj Muam, Tub Ntxhais hab Phooj Ywg moob txhua leej.
Sawv cev ntawm « KOOM HUM MOOB SIB SAU FAAB KIS TEB » nrug rua cov Tuam Tswj koom hum, sib koom lub peb caug nub nua, Peb suav dlawg muaj lug zoo sab tog txais PEB TSOOM MOOB hab MOOB TSOOM PHOOJ YWG txhua leej, tuaj koom peb MOOB lub PEB CAUG, xaus lub xyoo laug txais lub xyoo tshab.
Tau 32 xyoos kwv peb moob tau raug txais tuaj nyob faab kis teb, zag nuav yog zag peb kws ntau lub koom hum tau sib koom noj peb caug ua ke. Vaam tuaj rua ruab sab tas nua rua peg suab, cov koom hum moob faab kis yuav sib koom noj peb caug tsi tu ncua hab tsuas muaj coob zuj zug ntxiv moog.
Xyoo 2000 yog thawj zag kws cov koom hum lug sib sau noj peb caug ua ke, ua rua peb tsoom moob muaj kev zoo sab, tas peb moob faab kis pib muaj kev sib sau lawm. Txawm naj nub nuaj ua tsi tau yaam daab tsi tshwm sim rua peb moob suav dlawg pum, los cov koom hum feem ntau tseem sib koom lawv le suav dlawg pum hab ua pov thawj nub nua, le ntawd peb tsoom moob suav dlawg txhob rawm taag kev cas ab.
Moob, ntuj tsim teb raug, tsi paub sov yog thaum twg peb moob xeev xwm lug lawm. Peb tsi muaj ntawv teev tseg, peb tsi paub peb thaaj aav yog qhov twg, tug cam pib twg moog xaus rua twg. Peb yuav tib, yuav muab lub txim rua puj yawm txwv koob los tsi dlua nyob ntawm peb. Kev thuam, kev tib, kev rau txim yog txuj kev yooj yim tshaaj, tab sis yuav thoov txuj kev rua moob taug, yuav lug tsim zaaj lug nruag rua moob tau has ua puav pheej ca, tsi yog txuj kev yooj yim. Peb ncu ntsoov tas puj koob yawm txiv tseem tuaj tau lub npe MOOB hab txuj ci ca rua peb peb ua puab tsaug.
Moob, lawv le suav dlawg ntsuag saib, ntawm peb tej tug moob kheev, Tsi has kev kawm ntawv, kev lig dlej num, kev mob sab hab nquag, muaj lub sab tawv, nrawm tswv yim teg taw. Ua dlej num rua lwm haiv neeg mas luas qhuas kawg. Thaum peb rov lug sib thaam peb moob, coj peb moob, lig dlej num rua moob ces zoo le noj qaab txuj kev txawj ntsev, paub cai hab ncaaj nceeg kws kawm tau zoo lug lawm .... los sov yog cov nam txiv tsi kaam leeg paub tej tub kis txuj kev txawj ntse. Ib tug leeg ib tug rhuav. Nub nua pum zoo, pig kig hloov sab lawm, yog vim le caag ?
Tsoom moob nam moob txiv, mej tej txaj ntsim, tsoom tub ntxhais moob yuav ris, tsoom moob nam moob txiv, mej tej dlej num dlau lug, xeeb leej xeeb ntxwv moob yuav ncu ntsoo txug.Nub nua mej tub caj txiv, ntxhais caj nam, muaj kev txawj ntse nrug lwm haiv neeg sib txig, Nub nua mej cov tub moob ntxhais moob tuaj poob luas ntuj kawm luas TXUJ, muaj peev xwm taug tau luas RUJ, thov moob nam moob txiv ca sab hab ua sab LUJ.
Tsoom Tuam Tswj koom hum, tsoom tub ntxhais moob, nub nua nam txiv moob tso mej moog kawm tau txuj kev txawj NTSE, moob tog mej yuav lug coj moob lawm ib ntus kev. Thov mej muab LUAS txuj kev tseeb, kev ncaaj kev nceeg kws sauv tseg rua nruab NTAUB, cov lug nthuav qha rua peb tsoom moob paub. Thov mej muab lub sab dlawb kws mej kawm tau nyob rua luas nruab ntaw, cov lug nplij lug khu peb toom moob lub sab plaw. Thov mej muaj lub xeem lug tuaj kev tshoob, muab lub npe MOOB ua chaw tsom. Kwv tij yog kev coj dlaab, lub npe Moob txha yuav yog peb txuj hauv kaab. Nub twg lub npe MOOB tsi muaj TSIM, txuj kev txom nyem moob yuav tsiv tsi dlim. Nub twg lub npe MOOB nyob twg los luas ntxub, luas yuav muab peb MOOB cov lug tam luas khub.
Tsoom hluas tub hluas ntxhais, Peb moob tsi muaj lub teb chaws thaaj AAV kws peb yuav tau muab nyaj txag, txuj sa thaiv txha yuav tau ua nom tswv KAAV, Yog peb txawj sib hlub txha yuav tuaj tau lub npe MOOB rua nplaj teb CAAV. Lub caij nuav tsi muaj ib thaaj aav moob yuav tau nrug luas TU, Yog peb txawj sib hlub txha yuav tshuav lub npe MOOB rua nplaj teb HU. Moob txawm tsi muaj MOOB LUB NPE TEB CHAWS nrug luas kaav, Los MOOB yuav tau nrug luas KAAV TEB CHAWS.
Moob taam sim nuav nyob thoob ntuj, los peb yeej koom ib tug puj yawm. Leej twg, pawg twg rov tawv tuam ntuj tsi paub tas moob yog ib tsob tsi dlua nyob ntawm nwg. Moob nyob tuam tshoj, nyaab laaj, los tsuas, thaib, phab mab, Australia, Faab kis, Allemagne, Argentine, Canada, Amelika los txhua lub teb chaw muaj nuj nqe sib npaug zog. Nub twg peb tsoom moob, tsi has yuav nyob thaaj aav twg, muab lub sab ncaaj ncees, kev txawj ntse lug txhawb nqaa, nrug luas ua num ua tswv, taag qaab ntuj txhua lub teb chaws yuav fwm peb moob.
Kawg nuav, lub xyoo laug xaus, thov kev mob nkeeg, nyuas sab ntxhuv plawv, kev sib ntxub sib rhuav, txhua yaam tsi zoo ntawm peb tsoom moob, nrug xyoo laug moog kuas ntsej tsi noj muag tsi pum.
Lub xyoo tshab 2009 tawm tuaj, thov kev noj qaab nyob zoo, kev sib hlub sib paab, kev txawj kev ntse, kev ncaaj kev ncees muaj puj npo rua tsoom moob hab lug ntawm tsoom MOOB.
NYOB ZOO XYOO TSHAB 2009.
UA TSAUG
YAAJ Vaam Tuam
