Hmongdefrance.org - Union des Associations Hmong de France - Union des associations Hmong de France

Lub Ntees Cawv xeeb Cawv Lav

Tim 4.2.2011 mus txog Tim 9.2.2011 Nyob rau Fresno - California.

Zaum no tsis zoo li txhua zaus.
Zaum no tsis yog kev mus ua qhua.
Zaum no peb txiv huab tais yuav tsis rov los lawm.
Zaum no peb txiv huab tais ncaim peb mus tag ib txhiab ib txhis.
Zaum no peb txiv huab tais tso nws haiv hmoob nyob lawm ntiaj teb.

Peb leej txiv huab tais Vaj hmoob, lub ntees, cawv xeeb cawv lav zau no ua tau zoo nkauj thiab muaj txiaj ntsim. Peb haiv
hmoob zaum no txhua tus puav leej yog xyom cuab huv tib si. Peb cov hmoob txawm tuaj deb tuaj ze tuaj los puav leej yog tuaj sib pab ua hauj lwm.

Thov qhuas txog rau lub koom haum (Hmong International New Year)  Tus thawj tswj koom haum Liaj huas Vaj thiab tsoom tub tuav hauj lwm nej txhua tus, txhua yam hauj lwm yog nej ua cov coj thiab saib xyuas, nej muaj lub siab dawb paug los npaj peb txiv huab tais vaj hmoob  lub ntees cawv xeeb cawv lav mus rau qhov zoo lawm. Nej yuav tau koob hmoov zoo.

Thov qhuas txog cov niam tsev, cov txiv tsev, cov tub, cov ntxhais nej txhua tus puav leej yog mob siab kub siab tuaj sib pab ua hauj lwm. Ntseeg tau hais tias peb leej txiv huab tais hmoob Vaj pov yuav tseg koob tseg hmoov rau nej txhua tus.   

Peb leej txiv huab tais hmoob Vaj Pov tau hais tseg tias kuv cov hmoob, peb ua txiv thiab ua tub los xaus li no xwb mog, thov kom lwm tiam peb rov qab yug los ua ib tus hmoob es peb yuav rov qab ua txiv ua tub dua. 

Txoj kev ncaim tsis muaj leej twg xav txais, txoj kev ploj tsis muaj leej twg xav coj, peb yug los muaj ib txo sia xwb xav nyob kom tsis muaj hnub xaus, thaum txog lub caij ncaim lub ntiaj teb no lawm yuav tau ua ib siab lees paub. Thov kom muaj tseeb rau lwm tiam.

 Yog lawm, peb haiv hmoob txawm yuav nyob rau lub teb chaws twg, txawm yuav nyob rau thaj chaw twg los puav leej yog peb ib tus hmoob, pes tsawg tiam los peb yuav nco ntsoov los ua ib tus me nyuam hmoob. Hmoob lub koob thiaj li yuav tsis tu noob mus ib sis.

 Peb haiv hmoob yuav tsum tau lees paub peb tus kheej, peb yog hmoob tiag, peb yog ib co neeg muaj peev xwm tiag, peb muaj lub tswv yim zoo ua dab tsi los tau. Hnub no peb nyob lub teb chaws twg peb yuav tau tiv thaim lub teb chaws uas peb nyob ntawv.

Peb Txiv Huab Tais Vaj Pov Hmoob. Foom koob hmoov rau peb haiv hmoob.
Kom sawv daws txais kev noj qab nyob zoo. Xav tau dab tsi los kom tau.

Peb ib tsoom hmoob, lub neej thiab txoj sia puas yuav los mus sib cuag, hnub no peb twb tuaj nyob rau lub teb chaws vam meej lawm. zaum no yuav yog peb txoj hauj lwm los sib coj kom txawj kom ntse, peb thiaj li yuav tau lub neej zoo nrog luag ua mus lawm yav tom ntej.

Peb haiv hmoob, ua li peb puas yuav txawj xav rov qab tig los ua ib tus me nyuam hmoob, es yuav pib ua lub neej tshiab saib peb puas yuav txawj sib hlub tshaj yav tag los. Peb kev sib hlub yeej muaj txaus lawm tiam sis peb tsis txawj cob txawj qhia peb xwb.

Thov kom peb haiv hmoob txawj sib hlub sib pab, muaj tus coj los peb thiaj li yuav tau noj. peb yuav sib puag xub pwg kom ua ib tug thiaj yuav ruaj khov. Thov kom peb sib coj kom peb nce nto toj, kom peb haiv hmoob ciaj nom ciaj tswv thiab ciaj Vaj dua ib zaug ntxiv rau peb haiv hmoob.

Ntseeg tau hais tias peb tiam no yeej muaj ib tus huab tais hmoob tshwm sim los ua tib neeg nyob rau lub ntiaj teb no lawm, tiam sis peb tsis paub hais tias yog leej twg. Peb tus vaj hmoob ntawv yuav yog tus neeg muaj lub siab dawb siab dav thiab nws muab tag nrho nws lub neej txoj sia pab rau peb haiv hmoob. Tus neeg no yuav yog peb tus huab tais VAJ HMOOB.

Président

Union des Associations Hmong de France

Nom tshuas Vwj