Hmongdefrance.org - Union des Associations Hmong de France - Union des associations Hmong de France

Vwj Nom tshuas.

hnub tim 21.6.2009 kuv tau sawv kev mus rau teb chaw Amelika. mus xyuas teb chaws, xyuas kwv tij thiab mus koom lub July 4, 2009 nyob St Paul Minnésota.

Yawg hlob nkaj huas Yaj, yog tus thawj tswj xwm ntawm lub koom haum loj Lao family nyob rau St Paul Minnésota tau caw kuv mus koom lawv lub koob tsheej July 4 xyoo no.

Thov ua tsaug ntau rau tus thawj tswj koom haum Lao family Nkaj huas Yaj, koj muaj lub siab loj siab dav txais tos kuv. ua tsaug tas nrho rau cov tub tiam lis los yog tsoom kev txwj laus neeg nyob rau hauv lub koom haum loj, nej txhua tus tseem muaj lub siab zoo siab dawb txais tos kuv.

Yav tag los tsuas hnov hais tias hmoob Amelika ua July 4 xwb tsis paub hais tias yog dab tsi, peb cov hmoob fab kis muaj coob leej ntau tus mus koom tiam sis tsuas yog mus xyuas kwv tij thiab yos khw yuav khoom xwb.

Zaum no kuv tau mus pom thiab tsuj txog qhov chaw tseem ceeb lawm, kuv zoo siab ntau tau pom tej yam uas peb hmoob fab kis paub tsis txog, muaj ntau yam peb yuav tau kawm thiab xyaum.

Peb cov koom haum hmoob yog ib qho tseem ceeb rau peb txhua tus, tsis hais haiv neeg dab tsi, tsis hais teb chaws twg yuav tsum muaj koom haum xwb thiaj li ua tau dab tsi, peb cov hmoob leej twg txawm nyob deb lawm los yuav tsum nco ntsoov tias peb yog hmob, tsis txhob tu siab yeej meem tuaj nrhiav hmoob.

Peb yuav tsum sib koom tes tsis txhob sib ncaim ua ntau pab ntau pawg, peb yuav tsum ua raws li feem coob pom zoo xwb, qhov tseeb peb yuav tsum khaws tseg, qhov tsis yog peb yuav tsum muab tso tseg tsis txhob cia ua chaw chim, peb kev sib kho tseem muaj ntau yam peb yuav tau ua.

Peb cov hmoob nyob coob ua ke muaj teeb meem, qhov no hnov txhua tus hais, lo lus no tsuas yog hais qhov phem xwb, peb tsis nco qab pom qhov zoo lawm, peb yuav tsum nco ntsoov hais tias peb haiv hmoob yog ib haiv neeg txawj sib hlub sib pab tshaj nyob ntiaj teb no.

Kev vam meej kev txawj ntse, peb cov hmoob tuaj nyob rau teb chaws Amelika los yog lwm teb chaws, peb cov hmoob muaj coob tus ua hauj lwm loj nyob rau tsoom fwv, thiab tseem muaj cov tub txawj tub ntse txhua yam. qhov tseeb peb yuav tsum qhia peb cov me nyuam kom lawv paub hmoob yog leej twg.

Nom tshuas VWJ